Մոսկվան աջակցում է Հայաստանին. Էրդողանի խորհրդական

Թուրքիայի նախագահի գլխավոր խորհրդական Իբրահիմ Կալինը հայտարարել է, որ Թուրքիայի եւ Ռուսաստանի միջեւ տարաձայնություններ կան մի շարք հարցերի շուրջ, որոնցից մեկը «Լեռնային Ղարաբաղի հարցում Ռուսաստանի աջակցությունն է Հայաստանին», գրել է Մեդիամաքս գործակալությունը:

 Դեկտեմբերի 9-ին ելույթ ունենալով ԱՄՆ-ի Գերմանական Մարշալի հիմնադրամի (German Marshall Fund of the United States) կազմակերպած վեբինարին, Իբրահիմ Կալինը նշել է, որ «Թուրքիան հաճախ է քննադատվում Ռուսաստանի հետ լավ հարաբերություններ ունենալու համար»:

Թուրքիայի նախագահի գլխավոր խորհրդականն ասել է, որ վերջին տասնամյակների ընթացքում ԵԱՀԿ Մինսկի խումբը չկարողացավ հասնել ղարաբաղյան հակամարտության հարցի լուծմանը, եւ «Ադրբեջանը հիասթափված էր Ռուսաստանից, Ֆրանսիայից եւ ԱՄՆ-ից»:

«Արդյո՞ք ԱՄՆ-ն կամ Ֆրանսիան արել էին որեւէ առաջարկություն, որին Թուրքիան չէր աջակցել: Երբ ամերիկյան կողմը Հայաստանի եւ Ադրբեջանի արտաքին գործերի նախարարներին հրավիրեց Վաշինգտոն ՝ հրադադարի մասին պայմանավորվելու համար, ինձ զանգահարեց ԱՄՆ նախագահի խորհրդական Ռոբերտ Օ՛Բրայանը եւ հարցրեց մեր դիրքորոշման մասին: Մենք անմիջապես հայտարարություն արեցինք՝ ի պաշտպանություն զինադադարի, սակայն հաջորդ օրը հայկական կողմը վերսկսեց ռազմական գործողությունները», - ասել է Կալինը:

 Նա նշել է, որ Թուրքիայի արեւմտյան գործընկերները պետք է որպես «արժեքավոր ձեռքբերում» ընկալեն այն փաստը, որ թուրք զինվորականները, ռուսների հետ միասին, ներկայացված կլինեն Լեռնային Ղարաբաղում հրադադարի ռեժիմի պահպանման դիտարկման կենտրոնում:

Մեկնաբանելով տարածաշրջանում Ռուսաստանի ռազմական ներկայության ուժեղացման վերաբերյալ Արեւմուտքում հնչող քննադատությունը՝ Իբրահիմ Կալինը նշել է, որ «Ռուսաստանը ներկա է այս տարածաշրջանում առնվազն 100 տարի»:

  Բացի այդ, նա ասել է, որ «մտահոգված ուժերը կարող են Հայաստանի կառավարության հետ քննարկել այս երկրի տարածքում ռուսական ռազմակայանի առկայության հարցը»:

 Թուրքիայի նախագահի գլխավոր խորհրդականը մեկնաբանել է նաեւ ԵՄ առաջիկա գագաթնաժողովը, որի ժամանակ կարող են պատժամիջոցներ ընդունվել Անկարայի դեմ: «Ես տեսել եմ հայտարարության նախագիծը եւ պետք է ասեմ, որ պատժամիջոցների լեզուն հակառակ արդյունքն է ունենալու: 1-2 երկրների նեղ օրակարգը չպետք է ազդի Թուրքիայի եւ ԵՄ հարաբերությունների ողջ սպեկտրի վրա», - ասել է Իբրահիմ Կալինը եւ հավելել, որ «եվրակենտրոնությունը վնասում է առաջին հերթին Արեւմուտքի շահերին»: Ըստ Անկարայի ներկայացուցչի, «մենք միայն մեկ բան ենք խնդրում՝ բոլոր դերակատարներին դիտարկել իբրեւ հավասար գործընկերներ»: