Իրանը շատ մեծ զիջումների է գնում․ Թրամփ

ԱՄՆ նախագահ Դոնալդ Թրամփը պնդում է, որ Իրանը «շատ մեծ զիջումների» է գնում Միացյալ Նահանգների հետ բանակցությունների ընթացքում:

«Իրանը շատ մեծ զիջումների է գնում։ Տեսնենք, թե ինչ կստացվի», - ասել է ամերիկացի առաջնորդը՝ ԱՄՆ Կոնգրեսում լրագրողների հետ կարճատև զրույցի ժամանակ: Նա ժամանել էր Կապիտոլիումի բլուր՝ ԱՄՆ Սենատում իշխող Հանրապետական կուսակցության խմբակցության ղեկավարության հետ հանդիպելու համար՝ նախ և առաջ քննարկելու նոյեմբերին կայանալիք միջանկյալ ընտրությունների նախապատրաստական աշխատանքների ընթացքը:

Ավելի վաղ՝ այս ամիս, Վաշինգտոնը և Թեհրանը ստորագրել են փոխըմբռնման հուշագիր, որը նախատեսում է մարտական գործողությունների անհապաղ դադարեցում բոլոր ճակատներում, այդ թվում՝ Լիբանանում: Հունիսի 21-22-ը շվեյցարական Բյուրգենշտոկ հանգստավայրում անցկացվել են ԱՄՆ-ի և Իրանի բանակցությունները՝ Դոհայի և Իսլամաբադի միջնորդությամբ՝ հուշագրի իրագործման վերաբերյալ: Ինչպես նշվում է Պակիստանի և Կատարի համատեղ հայտարարության մեջ՝ բանակցությունների առաջին փուլի ավարտին, Իրանի և ԱՄՆ-ի ներկայացուցիչների մասնակցությամբ հանդիպումն անցել է դրական և կառուցողական մթնոլորտում, արձանագրվել է հուսադրող առաջընթաց, այդ թվում՝ հիմք է ստեղծվել հետագա տեխնիկական խորհրդակցությունների անցկացման համար: