Ռումինիայի կառավարությունը հրաժարական է տվել

Ռումինիայում վարչապետ Իլիե Բոլոժանի կառավարությունը հրաժարական է տվել խորհրդարանի կողմից անվստահություն հայտնելուց հետո։
Որոշմանը կողմ է քվեարկել ավելի քան 280 պատգամավոր. սա երկրի համար ռեկորդային ցուցանիշ է, որն արտացոլում է քաղաքական ճգնաժամի մասշտաբները, հայտնում են ԶԼՄ-ները։

Կառավարությունը փաստացի կաթվածահար էր եղել իշխող կոալիցիայի պառակտումից հետո։ Սոցիալ-դեմոկրատներն առաջինն էին հետ կանչել իրենց աջակցությունը կառավարությանը, ինչից հետո նրանց ներկայացուցիչները սկսեցին դուրս գալ նախարարների կազմից։ Սա հանգեցրեց իշխող թիմի փաստացի փլուզմանը և խորհրդարանական մեծամասնության կորստին։

Ընդդիմությունը կառավարությանը մեղադրում էր գնաճի, ավելացված արժեքի հարկի բարձրացման և բնակչության կենսամակարդակի վատթարացման մեջ։ Այս գործոնները դարձան անվստահության քվեի հիմնական փաստարկները և ուժեղացրին ճնշումը գործադիր իշխանության վրա։

Կառավարության հրաժարականից հետո երկրում սպասվում են քաղաքական խորհրդակցություններ՝ նոր կաբինետ ձևավորելու նպատակով։ Չի բացառվում կուսակցությունների միջև երկարատև բանակցությունների տարբերակը, ինչը կարող է ձգձգել իշխանության կայունացման գործընթացը։

Ռումինիայի նախագահ Նիկուշոր Դանը ժամկետից շուտ ընդհատել է արտասահմանյան այցը Հայաստան և վերադառնում է Բուխարեստ՝ հետագա քաղաքական իրավիճակի շուրջ խորհրդակցություններին մասնակցելու համար։