Թուրքիան 10 միլիարդ դոլարի մասնավոր ներդրում կհատկացնի արհեստական բանականության ներդրման նախագծերին

Թուրքիայում արհեստական բանականության (ԱԲ) ներդրման նախագծերի իրականացման համար կհատկացվի առնվազն 10 միլիարդ դոլարի մասնավոր միջոցներ։ Այս մասին հայտնել է հանրապետության նախագահ Ռեջեփ Թայիփ Էրդողանը։

«Թուրքիան ինտենսիվ ջանքեր է գործադրում պաշտպանական արդյունաբերության մեջ կուտակված փորձն ու հնարավորությունները այլ ոլորտներ տեղափոխելու համար, առաջին հերթին՝ ԱԲ-ի ոլորտ։ Մենք կմոբիլիզացնենք առնվազն 10 միլիարդ դոլարի մասնավոր ներդրումներ տվյալների մշակման կենտրոնների, ամպային տեխնոլոգիաների և ԱԲ-ի ենթակառուցվածքների զարգացման համար։ Մեր պետական ներդրումային ծրագրերի միջոցների առնվազն 2%-ը կհատկացնենք ԱԲ-ի ոլորտում նախագծերի իրականացմանը։ Մինչև 2030 թվականը մեր երկրում տվյալների մշակման կենտրոնների հզորությունը կավելացնենք առնվազն մինչև 1 ԳՎտ», - ասել է Էրդողանը Ստամբուլում՝ ԱԲ-ի ոլորտում գործողությունների պլանի հրապարակման արարողության ժամանակ։

Նրա խոսքով՝ Թուրքիայում ծրագրվում է պատրաստել 10 հազար փորձագետ ԱԲ-ի ոլորտում և շուրջ 100 հազար մասնագետ՝ դրա կիրառման գծով։

«Մենք ակտիվ դեր ենք խաղալու մարդակենտրոն ԱԲ-ի չափանիշների մշակման գործում՝ ՏՀԶԿ-ի (Տնտեսական համագործակցության և զարգացման կազմակերպություն), G20-ի, ՄԱԿ-ի և այլ միջազգային հարթակներում», - նշել է թուրք առաջնորդը։ «Հուսով եմ, որ միասին Թուրքիան կհասցնենք արհեստական բանականության դարաշրջանի առաջատար երկրների շարքին», - ընդգծել է Էրդողանը։

Թուրքիան ակտիվորեն ներդնում է ԱԲ-ն պետական կառավարման, պաշտպանության և բիզնեսի մեջ. հանրապետությունը համարվում է զրուցող նեյրոցանցերի կիրառմամբ աշխարհի առաջատարներից մեկը։