Նեթանյահուն կրկին սպառնացել Է Իրանին

Իսրայելը պատրաստ է «աներևակայելի պատասխան» տալ Իրանին, եթե վերջինս հարձակվի հրեական պետության վրա։  Նման նախազգուշացումով է հանդես եկել Իսրայելի վարչապետ Բենյամին Նեթանյահուն։ 

«Մենք պատրաստ ենք ցանկացած սցենարի։  Մի բան հաստատ է. եթե այաթոլլաները (Իրանի ղեկավարությունը-խմբ. ՏԱՍՍ) սխալ գործեն և հարձակվեն մեզ վրա, նրանք կկանգնեն այնպիսի պատասխանի առջև, որը նույնիսկ չեն կարող պատկերացնել», - ասել է նա՝ ելույթ ունենալով ռազմական ակադեմիայի ավարտական արարողության ժամանակ։  Նրա ելույթի տեսագրությունը տարածել է բանակի մամուլի ծառայությունը։

Նեթանյահուն նշել է, որ Իրանի հարցի վերաբերյալ Իսրայելի դիրքորոշումը մանրամասն ներկայացրել է ԱՄՆ նախագահ Դոնալդ Թրամփին անցած շաբաթ Վաշինգտոն կատարած այցի ժամանակ: Իսրայելական կողմը պնդում է, որ Թեհրանը պետք է ոչ միայն հրաժարվի հարստացված ուրանի պաշարներից, այլև ամբողջությամբ ապամոնտաժի միջուկային հարստացման համար նախատեսված իր ունեցած ողջ ենթակառուցվածքը: Բացի այդ, Իսրայելը պահանջում է, որ Իրանը դադարեցնի իր հրթիռային ծրագիրը՝ սահմանափակվելով ոչ ավելի, քան 300 կմ հեռահարության հրթիռներով և դադարեցնի օգնություն ցուցաբերել Մերձավոր Արևելքի իր դաշնակիցներին:

Ավելի վաղ CBS հեռուստաալիքը հայտնել էր, որ ԱՄՆ վարչակազմը դիտարկում է Իրանի դեմ ռազմական գործողություն սկսելու հնարավորությունը արդեն փետրվարի 21-ին: Հունվարին Սպիտակ տանը նախազգուշացրել էին, որ լրջորեն պատրաստ են ուժ կիրառել, եթե Թեհրանը չնստի բանակցությունների սեղանի շուրջ և չկնքի «արդար գործարք», որը ենթադրում է միջուկային զենքից լիակատար հրաժարում: Իրանի իշխանությունները բազմիցս հայտարարել են ատոմային ռումբ ստեղծելու մտադրության բացակայության մասին:

Փետրվարի 17-ին Ժնևում տեղի է ունեցել ԱՄՆ-ի և Իրանի միջև Թեհրանի միջուկային դոսյեի շուրջ Օմանի միջնորդությամբ բանակցությունների երկրորդ փուլը: Իրանի ԱԳՆ-ում հայտարարել են մի շարք դրույթների շուրջ փոխըմբռնման մասին, որոնք կարող են ներառվել ապագա համաձայնագրի նախագծում: Վաշինգտոնը հայտարարել է, որ խորհրդակցությունները լավ են անցել, սակայն Թեհրանը դեռ պատրաստ չէ ճանաչել մի շարք դիրքորոշումներ, որոնք նախանշել Է Սպիտակ տունը: Ավելի վաղ ԱՄՆ-ն և Իսրայելը պնդում էին, որ Իրանը հրաժարվի ոչ միայն միջուկային ծրագրի զարգացումից, այլև բալիստիկ հրթիռների արտադրությունից, ինչպես նաև Մերձավոր Արևելքում իրանամետ ուժերին աջակցելուց: