Արագածոտնի մարզպետը հերքում է, թե հայտարարագրից դուրս գույք ունի

Սոցցանցերում լուրեր են տարածվել, որ Արագածոտնի մարզպետ Սերգեյ Մովսիսյանին պատկանող մի շարք անշարժ գույքեր կան, որոնք նրա հայտարարագրում առկա չեն: 

Մասնավորապես, այդ տեղեկությունների համաձայն, Մովսիսյանին են պատկանում «Երևանում՝ Սունդուկյան փողոցի բնակարանը, Աշտարակ քաղաքի Սիսակյան փողոց 14 շենքում ունեցած տարածքը, Երևանում Ա.Ավետիսյան փողոցի բնակարանը, Աշտարակում՝ 16-րդ թաղամասում հողատարածքը, Աշտարակում՝ Արտակի փողոցի հողամասերն ու առևտրի սրահը, Տիգրան Մեծ փողոցի սեփականությունը և այլն, ինչպես նաև Աշտարակ քաղաք Արտակի փողոցում հասարակական նշանակության բազմահահարկ շինություն է կառուցվում, որը նույնպես նրան է պատկանում»: 

News.5tv.am-ը տեղեկությունը ստուգելու ու պարզաբանում ստանալու համար պաշտոնական գրավոր հացմամբ դիմել էր Սերգեյ Մովսիսյանին՝ հարցնելով, թե թվարկված գույքը իրեն կամ իր մերձավոր ազգականների՞ն են պատկանում: 

Մարզպետից ստացել ենք հետևյալ պատասխանը. «Ձեր հարցմանն ի պատասխան հայտնում եմ, որ ինձ պատկանող յուրաքանչյուր գույք ներկայացվում է իմ կողմից լրացվող ամենամյա հայտարարագրում»: Սերգեյ Մովսիսյանը հայտարարագել է 3 հողամաս, անհատական բնակելի տուն, բնակարան: