Մի՛ դրդեք մեզ՝ ի գործ դնելու աստվածային իշխանությունը, կա՛նգ առեք և ապաշխարեցե՛ք․ Ասողիկ աբեղա Կարապետյան

Վերստին զգաստության կոչ․

Սրտի անկեղծ ցավով ենք արձանագրում, որ Հայրենի իշխանության որոշ ներկայացուցիչներ՝ ձայնակցելով ՀՀ վարչապետ Նիկոլ Փաշինյանին, գիտակցորեն շարունակում են ընդդեմ Սբ Եկեղեցու եւ նրա աստվածարյալ Նվիրապետության իրենց անպատկառ եւ անպարկեշտ ընթացքը՝ գայթակղեցնելով եւ չարության թթխմոր առաջ բերելով հավատավոր ազգի ծոցում եւ այդպես, արդեն, հերձվածողության դուռ բացելով:

Քանի՜ անգամ Սբ Եկեղեցին, անհատաբար եւ ժողովաբար, զգաստության կոչ է արել իշխանություններին, որոնց ներկայացուցիչները հանդիսանում են Հայոց Եկեղեցու մկրտյալ անդամներ եւ (իրենց իսկ պնդումների համաձայն) հավատարիմ հետեւորդներ, որպեսզի նրանք չչարաշահեն իրենց պաշտոնական հանգամանքը՝ ոտնահարելով Սահմանադրությունն ու օրենքները, կանգ առնեն, դադարեցնեն իրենց հարձակումները եւ ապաշխարեն: Որպես հայ քրիստոնյաներ ապաշխարեն:

Սակայն, ի ցավ սրտի, ինչպես տեսնում ենք, ոչինչ չի փոխվում. մնում են նույն անզգամ չարության մեջ, ավելին՝ շարունակում են իրենց ոչ քիստոնեավայել եւ ապօրինի ընթացքը:

Որպես ձեռնադրյալ եւ օծյալ հոգեւորական՝ Ամենակալ Տիրոջից տրված հոգեւոր իշխանությամբ եւ զորությամբ, ամենայն սիրով, նորեն զգաստության եւ ապաշխարության կոչ եմ անում իշխանության որոշ ներկայացուցիչներին:

Այլեւ հարկ եմ համարում նրանց տեղեկացնել, որ, հակառակ պարագային, հարկադրված ենք լինելու խորհելու անվանական բանադրանքի մասին, քանի որ նրանք, այլեւս, հատում են հավատքի եւ հոգեւոր կյանքի բոլո՛ր սահմանները:

Սբ Ներսես Դ. Շնորհալի եւ Տ. Տ. Ներսես Ե. Աշտարակեցի Ամենայն Հայոց Կաթողիկոսների սահմանած կանոններն արտոնում են՝ որեւէ քահանա կամ եպիսկոպոս իրավունք ունի բանադրելու Սբ Եկեղեցու մոլորյալ ու հանցապարտ անդամներին՝ հոգեւոր-բարոյական «զանազան հանցանքների կամ պատվիրազանցության համար»:

Հայրապետահաստատ կանոնները սահմանում են. «Եթե քահանան մեկին բանադրում է զանազան հանցանքների կամ պատվիրազանցության համար, ուրիշ քահանա տգիտաբար այդ բանադրյալին չպիտի թույլ տա իր եկեղեցին մտնելու, բոլոր քահանաները պիտի մերժեն նրան, մինչեւ որ չզղջա մեղավորը եւ թողություն խնդրելով բանադրանքը վերացնել տա» (Սբ Ներսես Շնորհալի, Կանոն 36), «Եթե մի քահանա մի որեւէ հանցանքի համար բանադրում է ժողովրդականին, ուրիշ քահանա իրավունք չունի բանադրանքը վերցնելու, վերցնողը ինքը կբանադրվի» (Տ. Տ. Ներսես Ե. Աշտարակեցի, Կանոն 77):

Կա՛նգ առեք, տիկնայք եւ պարոնայք պաշտոնյաներ, խնդրանքս է ձեզ, ի սեր Աստծո վե՛րջ տվեք այս հրեշավոր ընթացքին, որի մեջ սեր եւ լույս իսպառ չկա, քանզի միմիայն թշնամու վարմունք է:

Սոսկալի է եկեղեցական բանադրանքը՝ իր ծանրագույն հետեւանքներով այս կյանքում եւ հանդերձյալում: Արդ, մի՛ դրդեք մեզ ի գործ դնելու աստվածային իշխանությունը. կա՛նգ առեք և ապաշխարեցե՛ք:

Ասողիկ աբեղա Կարապետյան

Մայր Աթոռ Սուրբ Էջմիածնի միաբան