ՄԱԿ-ը կորցրել է ամեն տեսակ հեղինակություն, գործում է ուժեղի իրավունքը․ Սերբիայի նախագահ

Ժամանակակից աշխարհում միջազգային իրավունքը փաստացի դադարել է գործել, դրա տեղը զբաղեցրել է «ուժեղի իրավունքը», ուստի Սերբիան ստիպված է ամրապնդել սեփական պաշտպանական կարողությունները և ավելացնել սպառազինության արտադրությունը։ Ինչպես հայտնում է ՏԱՍՍ-ը, այս մասին հայտարարել է Սերբիայի նախագահ Ալեքսանդր Վուչիչը։

«ՄԱԿ-ը կորցրել է ամեն տեսակ հեղինակություն, գործում է ուժեղի իրավունքը։ Միջազգային իրավունքն աշխարհում այլևս գոյություն չունի։ Ես ստացել եմ նյութեր Իրանի հարցով ՄԱԿ-ի Անվտանգության խորհրդի նիստի վերաբերյալ, բայց ես ավելի կարևոր գործեր ունեի, քան սովորական քաղաքական դատարկախոսություն կարդալը, որը ոչնչի չի ծառայում»,- նշել է նա։

Նախագահի խոսքով՝ նման պայմաններում Սերբիան պետք է մեծացնի իր պաշտպանական արդյունաբերության հզորությունը։ «Ես պնդում եմ, որ մենք այսուհետ ևս բարձրացնենք ազգային արտադրության մակարդակը։ Մենք արդեն բարձրացրել ենք հրթիռների, նռնակների և զինամթերքի արտադրության մակարդակը։ Մենք կապահովենք առավելագույնս հուսալի շուկա մեր ռազմական արդյունաբերության համար»,- ասել է Վուչիչը։

Նախագահն ընդգծել է, որ պաշտպանական կարողությունների զարգացումն անհրաժեշտ է խաղաղության պահպանման համար։ «Արդյո՞ք մենք պատրաստվում ենք հակամարտությունների։ Ո՛չ։ Մենք դա անում ենք հենց խաղաղությունը պահպանելու համար. դա միակ երաշխիքն է։ Հակառակ դեպքում մենք անհավանական հեշտությամբ զոհ կդառնայինք»,- շեշտել է նա։ «Դուք հարցնում եք՝ ո՞վ կարող է հարձակվել մեզ վրա։ Գրեթե յուրաքանչյուրը։ Այսօրվա աշխարհում ոչ ոք պարտավոր չէ բացատրել, թե ինչու է հարձակվել. հարձակվում են՝ ինչպես ում մտքով անցնի, ով որ ոտքի վրա տեղից վեր կենա»,- կարծում է նախագահը։»