Ուկրաինան ստացել է ԵՄ-ին անդամակցելու պայմանների ամբողջական փաթեթը

Ուկրաինան Եվրամիությունից ստացել է համայնքին անդամակցելու պայմանների ամբողջական փաթեթը։ Ինչպես փոխանցում է ՏԱՍՍ-ը, հայտնել է երկրի վարչապետ Յուլիա Սվիրիդենկոն:

«Այսօր Բրյուսելում ուկրաինական պատվիրակությունը Եվրոպական միությունից ստացել է անդամակցության պայմանները վերջնական երեք բանակցային կլաստերների վերաբերյալ: Խոսքը 3-րդ՝ «Մրցունակություն և ներառական զարգացում», 4-րդ՝ «Կանաչ օրակարգ և կայուն կապեր» և 5-րդ՝ «Ռեսուրսներ, գյուղատնտեսություն և համախմբվածության քաղաքականություն» կլաստերների մասին է»,-գրել է նա իր Telegram-ալիքում:

Ուկրաինայի կառավարության ղեկավարը հիշեցրել է, որ Կիևին պայմանների մի մասն արդեն ներկայացվել էր դեկտեմբերին: Սվիրիդենկոն պարզաբանել է, որ երկիրն այժմ ունի «պայմանների ամբողջական փաթեթը, որոնց կատարումն անհրաժեշտ է ԵՄ անդամակցության համար՝ պատմության մեջ առաջին անգամ»:

Ավելի վաղ եվրոպական և եվրոատլանտյան ինտեգրման հարցերով փոխվարչապետ Տարաս Կաչկան հայտարարել էր, որ ԵՄ մի շարք երկրներ կարծում են, թե Ուկրաինան պետք է բարեփոխումներ իրականացնի և «սպասի» 20 տարի, նախքան կդառնա համայնքի լիիրավ անդամ։ Նա նաև ասել է, որ Գերագույն ռադան պետք է ընդունի շուրջ 300 օրենք, որպեսզի երկիրն ընդունվի Եվրոպական միություն, սակայն դրա համար անհրաժեշտ է ուկրաինական խորհրդարանի բնականոն աշխատանքը։ Կաչկան հավելել է, որ եվրոինտեգրման շրջանակներում Կիևի համար կան նաև այլ բարդ հարցեր, օրինակ՝ ԵՄ ընդհանուր գյուղատնտեսական քաղաքականությանը հարմարվելու փորձը։

ԵՄ-ին անդամակցելու շուրջ բանակցություններն ուղղված են թեկնածու երկրի ողջ օրենսդրության համապատասխանեցմանը Եվրոպական միության օրենսդրությանը։ Սովորաբար դրանք տևում են ավելի քան 10 տարի, և այս գործընթացի համար խիստ ժամկետներ գոյություն չունեն։ Օրինակ՝ Թուրքիան ԵՄ-ին անդամակցելու բանակցությունները սկսել է 2005 թվականին. այսպիսով, դրանք շարունակվում են արդեն 20 տարի՝ առանց այդ երկրի անդամակցության որևէ իրական հեռանկարի։

Եվրահանձնաժողովն առաջարկում էր Ուկրաինայի՝ ԵՄ անդամակցության շուրջ բանակցությունները սկսել դեռևս 2024 թվականին, սակայն այդ ծրագրերը ձախողվեցին Հունգարիայի դիրքորոշման պատճառով։ Վլադիմիր Զելենսկին բազմիցս պնդել է, որ Կիևը պետք է անի հնարավոր ամեն ինչ, որպեսզի տեխնիկապես պատրաստ լինի Եվրոմիությանն անդամակցելուն մինչև 2027 թվականը։ Մարտի սկզբին ընդլայնման հարցերով եվրոհանձնակատար Մարտա Կոսը հայտարարեց, որ Ուկրաինան չի կարողանա անդամակցել ԵՄ-ին մինչև 2027 թվականը՝ գոյություն ունեցող ընթացակարգի շրջանակներում։