Մենք մեր վեհափառի ու եկեղեցու կողքին ենք. Տեր Մանուկ

Արագածոտնի թեմի հոգևորական Տեր Մանուկ քահանա Զեյնալյան «News. 5tv.am»-ի հետ զրույցում ներկայացրել է, թե ինչպես են իրավապահները խուզարկել իր բնակարանը.

«Առավոտյան շատ շուտ էր, դեռ քնած էինք, երեխաներն էլ քնած էին, բայց շատ կարճ ժամանակ հետո պատրաստվում էին դպրոց գնալու, մոտավորապես 7:15-ի կողմերն էր, և դուռը թակեցին, բացեցինք, իրենք 4-5 հոգի էին: Ասացին, որ պիտի տունը խուզարկեն: Ես ծանուցագիր ուզեցի, իրենք ներկայացրին ծանուցագիրը: Խուզարկեցին, ամբողջ տունը տակնուվրա արեցին, փնտրում էին փաստաթղթեր և այլն՝ կապված գործի հետ, բայց ոչինչ չգտան: Տարել են իմ և տան անդամների բջջային հեռախոսները, 2 համակարգիչ և մեկ կրիչ են տարել: Առանձնապես բան չեն գտել, կազմվել է արձանագրություն, բայց արձանագրության պատճենը չեն ներկայացրել: Չեմ շփվել իրենց հետ, ուղղակի հետևել եմ, թե ինչպես են իրենց գործողություններն անում: Շատ չենք հուզվել, չենք վախեցել, երեխաներն էլ շատ նորմալ տարան այդ ամեն ինչը: Անակնկալ էր շատ ինձ տանելու պահը, երբ իրենք հայտնեցին, որ ես իրենց հետ անպայման պիտի գնամ: Ես չառարկեցի, իրենց հետ գնացի քաղաքային կոմիտե, և ցավալիորեն ամբողջ օրվա ընթացքում ոչ մի քննիչի հետ հանդիպում չեղավ, անիմաստ ամբողջ օրը սպասեցի, պահեցին մինչև ժամը 7-ը: Ես պահանջեցի, որ իրենք փաստաբան տան, հաջորդ օրը՝ ժամը 3-ին գնացել եմ, ցուցմունքը իրենց կողմից արձանագրվել է արդեն իմ փաստաբանի ներկայությամբ»,- պատմում է Տեր Մանուկը: 

Նրա խոսքով՝ Թեմում եղած ժողովրդի կողմից, հավատացյալների կողմից պայմանավորված բոլոր ծիսական արարողությունները չեղարկվել են, որովհետև արդեն իսկ ամբողջ թեմը գլխատված էր, հոգևոր առաջնորդին և դիվանապետին տարել էին.
«Անցյալ օրը առաջին պատարագն եմ մատուցել Կարմրավոր Սուրբ Մարիամ Աստվածածին եկեղեցում: Պատարագի կեսից Վեհափառ հայրապետին և առաջնորդ սրբազան հորը հիշատակելու ժամանակ այն ծանր ապրումն ու զգացողությունն եմ ունեցել, ինչ որ ապրեցինք Արցախը կորցնելու ժամանակ: Աղոթում եմ, որպեսզի ամեն բան խաղաղությամբ ավարտվի, որովհետև մեր հոգևոր դասը ուղղակի բարեկամն ու ընկերն է, ցավակիցն է ուրախության ու տխրության այս ժողովրդի: 

Ես 20 տարվա օծյալ հոգևորական եմ, երեսս պարզ մեր ժողովրդին ծառայել եմ, երբևէ իմ պատճառով չի եղել, որ եկեղեցին կամ հայրենիքը երկրորդ պլան մղվի: Անկեղծ սրտով ծառայել ենք այս հայրենիքին: Գնացեք քննեք Մկրտիչ սրբազանի՝ մանավանդ այս վերջին շրջանում կատարած աշխատանքները, 3 եկեղեցի է օծվել միայն Թալինի տարածաշրջանում: 650-ից ավելի երիտասարդներ ունեինք, ազգային եկեղեցական բոլոր տոները բարձր մակարդակով տոնվել ու հիշատակվել են, ուխտագնացություններ, ուխտ-երթեր: Մի խոսքով՝ այս ամբողջը պարալիզացվեց, և սրա պատասխանը պիտի տան նրանք, ովքեր քար գցեցին մեր առաջնորդարանի, մեր եկեղեցու, հոգևոր դասի և հատկապես մեր առաջնորդի վրա, բոլորը պիտի պատասխան տան: 

Մենք՝ հոգևորականներս ուժեղ ենք, մենք մեր Վեհափառ հայրապետի կողքին ենք, մեր ազգային ու սուրբ եկեղեցու կողքին ենք: Թեև մեր ծոցի մեջ տաքացրել ենք օձեր, և այդ օձերը հիմա խածոտում են մեզ, բայց դրանց վերջն էլ կգա: Ես անձամբ մի քանի անգամ հանդիպում եմ ունեցել Տեր Արամ կոչվածի հետ, և իրեն խնդրել եմ, որ ինքը գա հոգևոր դաշտ, որովհետև իրեն ոչ կարգալույծ են արել, ոչ էլ որևէ մեկը իրեն նեղացրել է: Սուտ է ամեն բան: Թողեք հանգիստ այս եկեղեցուն, այս ժողովրդին թողեք հանգիստ: Այնպես արեցին, որ մարդկանց մեջից ամոթն էլ կորել է, ով ում ոնց ուզում, հայհոյում է: Հիասթափություն, մարդիկ իրար չեն վստահում, մի՞թե մենք էս էինք»,- ասաց Տեր Մանուկը: