Իրանի հետ հակամարտությունը կտևի ևս 2-4 շաբաթ․ Ռուբիո

ԱՄՆ պետքարտուղար Մարկո Ռուբիոն Ֆրանսիայում կայացած «Մեծ յոթնյակի» երկրների արտաքին գործերի նախարարների հանդիպման ժամանակ հայտարարել է, որ Իրանի հետ հակամարտությունը կտևի ևս երկուսից չորս շաբաթ։ Ինչպես փոխանցում է ՏԱՍՍ-ը, այս մասին հայտնել է Axios պորտալը՝ հղում անելով իր աղբյուրներին։

Ռուբիոն նաև նշել է, որ ԱՄՆ-ը մոտ է Իրանի հետ լուրջ բանակցություններ սկսելուն։ Նա հավելել է, որ առայժմ ամերիկացիները Թեհրանի հետ շարունակում են հաղորդակցվել միջնորդների միջոցով, այլ ոչ թե ուղղակիորեն։

Փետրվարի 28-ին ԱՄՆ-ը և Իսրայելը ռազմական գործողություն են սկսել Իրանի դեմ։ Հարվածների տակ են հայտնվել իրանական խոշորագույն քաղաքները, այդ թվում՝ Թեհրանը։ Իսլամական հեղափոխության պահապանների կորպուսը (ԻՀՊԿ) հայտարարել է լայնամասշտաբ պատասխան գործողության մասին՝ գրոհելով Իսրայելը։ Հարվածների են ենթարկվել նաև ԱՄՆ օբյեկտները Բահրեյնում, Հորդանանում, Կատարում, Քուվեյթում, ԱՄԷ-ում և Սաուդյան Արաբիայում։ Մարտի 11-ին Իրանի զինված ուժերի «Խաթամ ալ-Անբիա» կենտրոնական շտաբի ներկայացուցիչը հայտարարել է, որ Իրանը թույլ չի տա Հորմուզի նեղուցով, որով անցնում է համաշխարհային նավթի արտահանման մոտ մեկ հինգերորդը, տեղափոխել որևէ նավթային բեռ, որն առնչություն ունի Միացյալ Նահանգների և նրանց դաշնակիցների հետ։