Իրանը մեղադրել է ԱՄՆ-ին միջուկային զենքի չտարածման պայմանագրի (ՄԶՉՏ) վերանայման կոնֆերանսի տապալման մեջ

Միջուկային զենքի չտարածման պայմանագրի (ՄԶՉՏ) վերանայման կոնֆերանսը երրորդ անգամ անընդմեջ ավարտվել է առանց ամփոփիչ փաստաթղթի՝ ԱՄՆ-ի և նրա դաշնակիցների գործողությունների պատճառով։ Այս մասին հայտարարել է ՄԱԿ-ում Իրանի մշտական ներկայացուցչությունը։

«ԱՄՆ-ի չափից ավելի պահանջները ՄԶՉՏ-ն մղում են ազատ անկման», - ասված է հայտարարության մեջ։ Իրանի մշտական ներկայացուցչությունում հայտարարել են, որ վերանայման կոնֆերանսը «երրորդ անգամ անընդմեջ տապալվել է Միացյալ Նահանգների և նրա դաշնակիցների կողմից իրականացված խոչընդոտումների պատճառով»։ Իրանական կողմը նաև նախազգուշացրել է, որ «առանց միջուկային զինաթափման հնարավոր չէ պատկերացնել ՄԶՉՏ-ի ապագան»։

Ավելի վաղ ՄԱԿ-ում Վիետնամի մշտական ներկայացուցիչ Դո Հունգ Վիետը, որը կատարում է կոնֆերանսի նախագահի պարտականությունները, հայտարարել էր, որ կոնֆերանսի արդյունքներով չի հաջողվել կոնսենսուսի հասնել ամփոփիչ փաստաթղթի շուրջ։

Ապրիլի 27-ին Նյու Յորքում՝ ՄԱԿ-ի կենտրոնակայանում, սկսվել էր ՄԶՉՏ-ի գործողության վերանայման 11-րդ կոնֆերանսը։ Այս կոնֆերանսը տեղի է ունենում հինգ տարին մեկ անգամ և հավաքում է պայմանագրի գրեթե բոլոր մասնակից երկրներին (191 պետություն)՝ գնահատելու համար, թե ինչպես է իրականացվում ՄԶՉՏ-ն երեք հիմնական ուղղություններով՝ չտարածում, միջուկային զինաթափում և ատոմային էներգիայի խաղաղ օգտագործում։ Կոնֆերանսի աշխատանքներն ավարտվել են ուրբաթ օրը։