Օտարերկրյա ահաբեկիչները կարող էին ֆինանսավորվել ԱՄՆ բյուջեի հաշվին․ Վենս

Օտարերկրյա ահաբեկչական խմբավորումները ԱՄՆ-ում իրականացված խարդախությունների արդյունքում կարող էին ստանալ ամերիկյան բյուջետային միջոցներ։ Այս մասին հայտարարել է ԱՄՆ փոխնախագահ Ջեյ Դի Վենսը։

«Մենք, անշուշտ, արձանագրել ենք, որ մի շարք այլ երկրների իշխանություններ և օտարերկրյա ահաբեկչական կազմակերպություններ պոտենցիալ կերպով հարստացել են այդ ռեսուրսների հաշվին», - նշել է նա «Fox News» հեռուստաալիքի լրագրողներին տված հարցազրույցում՝ խոսելով դաշնային ծրագրերի շրջանակներում հատկացվող միջոցների ոչ նպատակային օգտագործման բացահայտված դեպքերի մասին։ Վենսը չի հստակեցրել, թե հատկապես որ խմբավորումների կամ ծրագրերի մասին է խոսքը։ Ինչպես նա նշել է, մասնավորապես եղել են օրինակներ, երբ ԱՄՆ-ում անօրինական ներգաղթյալները խարդախությամբ ֆինանսական օգնություն են ստացել իշխանություններից և այդ միջոցներն ուղղել լատինամերիկյան երկրներում գործող թմրակարտելներին։ ԱՄՆ վարչակազմն այդ կարտելներից շատերին համարում է ահաբեկչական խմբավորումներ։

«Սա անհավանական է. դուք հարկեր եք վճարում, և այդ միջոցները հասնում են ահաբեկիչներին այն ժամանակ, երբ ձեր երկիրը փորձում է խանգարել այդ նույն ահաբեկիչներին սպանել այլ ամերիկացիների։ Սա շոկային է, բայց հենց դա է տեղի ունենում, երբ դաշնային կառավարությունը աչք է փակում այդ ամենի վրա», - հավելել է Վենսը։

Ապրիլի սկզբին ԱՄՆ առաջնորդ Դոնալդ Թրամփը հայտնել էր, որ Վենսը պատասխանատու է լինելու ԱՄՆ-ում խարդախության դեմ պայքարի համար։