Էրդողանը և ՀԱՄԱՍ-ի ներկայացուցիչները քննարկել են իրավիճակը Գազայում

Թուրքիայի նախագահ Ռեջեփ Թայիփ Էրդողանը Ստամբուլում պաղեստինյան ՀԱՄԱՍ շարժման պատվիրակության հետ քննարկել է Գազայի հատվածում տիրող իրավիճակը։

«Մեր նախագահ Ռեջեփ Թայիփ Էրդողանն ընդունել է ՀԱՄԱՍ-ի պատվիրակությանը Ստամբուլի «Դոլմաբահչե» աշխատանքային գրասենյակում։ Հանդիպման ընթացքում քննարկվել է Գազայում տիրող վերջին իրավիճակը»,- հայտնել է Թուրքիայի առաջնորդի գրասենյակը։

Հանդիպման այլ մանրամասներ չեն հաղորդվում։

Ավելի վաղ՝ շաբաթ օրը, եգիպտական Al Qahera News հեռուստաալիքը, հղում անելով իր աղբյուրներին, հայտնել էր, որ վերջին երկու օրերին Եգիպտոսում տեղի են ունեցել Գազայի հարցով բանակցություններ՝ միջնորդների և «Խաղաղության խորհրդի» բարձր ներկայացուցիչ Նիկոլայ Մլադենովի մասնակցությամբ։ ՀԱՄԱՍ-ը և պաղեստինյան խմբավորումները վերահաստատել են իրենց հանձնառությունը հրադադարի մասին համաձայնագրի իրագործմանն ուղղված քայլերին։