Դավիթ Անհաղթի այգուց հերթական ծառերն են արմատախիլ արել ու գողացել

ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Քանաքեռ-Զեյթունի բաժնի պետ Մելիք Սոֆոյանի համար, կարծես, ավանդույթ է դարձել հանցագործությունների չբացահայտելու արատավոր երևույթը։ Միայն նրա ղեկավարած վարչական տարածքում վերջին ամիսներին մի քանի անգամ անհայտ անձը կամ անձինք արմատախիլ են արել և գողացել ոչ միայն Քանաքեռ-Զեյթուն համայնքի բնակիչների, այլև մայրաքաղաքի և մարզերի հարյուրավոր բնակիչների համար սիրելի հանգստի վայր համարվող «Դավիթ Անհաղթ» զբոսայգում, հիմնանորոգումից հետո Երևանի քաղաքապետ Տիգրան Ավինյանի և Քանաքեռ-Զեյթուն վարչական շրջանի ղեկավար Արտակ Հովակիմյանի կողմից տնկված 30-ից ավելի ծառեր։Ինչպես տեղից հայտնում է ֆոտոլրագրողը, միայն վերջին մի քանի ամիսների ընթացքում ծառագողը կամ ծառագողերը նշված այգուց հասցրել են գողանալ այդքան ծառ, և ամեն անգամ քաղաքապետի և վարչական շրջանի ղեկավարի կողմից հերթական ծառերն են տնկվում, ու օրեր անց քաղաքապետարանի աշխատակիցները դրանք հայտնաբերում են նորից գողացված։

Նշված գողությունների մասին տեղյակ են ոստիկանության Քանաքեռ-Զեյթունի բաժնում, սակայն, չգիտես ինչու, մինչև այժմ Քանաքեռ-Զեյթունի ոստիկանները՝ բաժնի պետ Մ. Սոֆոյանի գլխավորությամբ, կամ չեն կարողանում, կամ չեն ցանկանում, կամ էլ անզոր են դրա դեմն առնել, մինչդեռ ոստիկանությունը այգուց հեռու է հազիվ 1 կմ։Ֆոտոլրագրողի տեղեկություններով՝ առաջիկայում այգում տեղադրվելու են տեսախցիկներ։

Ինչպես ավելի վաղ հայտնել էր SHAMSHYAN.com-ը՝ հունիսի 9-ին, Երևանի քաղաքապետարանի «Աղբահանություն և սանիտարական մաքրում» հիմնարկի, Քանաքեռ-Զեյթուն վարչական շրջանի ղեկավարի աշխատակազմի սանմաքրման և կանաչապատման աշխատակիցները, մի խումբ կամավորականներ՝ հիմնականում Քանաքեռ-Զեյթուն վարչական շրջանի բնակիչներ, մի քանի ժամ շարունակ սանիտարական մաքրման աշխատանքներ էին իրականացրել դեռ սովետական տարիներից երևանցիների համար ամենասիրելի վայրերից մեկում՝ «Դավիթ Անհաղթ» զբասայգում, որը նաև հայտնի էր «Զեյթունի շատրվաններ» անվամբ։ Գրեթե 7 ժամից ավելի մաքրման աշխատանքները չէին դադարում։

Հեռացվել էր մի քանի բեռնատար աղբ և դա ոչ թե այսօր, այլ նախկնում ևս մի քանի անգամ Երևանի քաղաքապետարանի ու Քանաքեռ-Զեյթունի թաղապետարանի կատարած մաքրման աշխատանքի արդյունքում։Ֆոտոլրագրողի հետ զրույցում քաղաքացիները, այդ թվում՝ ավագ սերնդի ներկայացուցիչներ, նշում էին․ «Մենք դեռ սովետական տարիներին ենք տեսել, թե ինչ հրապուրիչ ու գողտրիկ անկյուն էր այս տարածքը։ Մի քանի սերունդ է այս այգին վայելել։ Շատրվանները, նամանավանդ ամռան տապին, գերում էին ոչ միայն զեյթունցիներին, այլ նաև Երևանի մյուս համայնքների ու հարակից այլ շրջանների բնակիչներին։ ԽՍՀՄ փլուզումից հետո այգին վերածվեց մի իսկական «սոդոմ գոմորի»։ Ինչ ասես չեկավ էս այգու գլխին։

Հետո իմացանք, որ մոտ 3 մլրդ դրամով բանկերից մեկում գրավադրել էին այգին ու դրանից հետո այն ոչ թե ծաղկեց, այլ կանգնեց ոչնչացման շեմին։ 2018 թվականի հեղափոխությունից հետո մտածում էինք, թե ոչ էլ կզբաղվեն էս այգով ու ինչպես զոռբայությամբ պետությունից խլել էին այն, այդպես էլ կմնա։

Բայց ի ուրախություն մեզ՝ ՀՀ կառավարությունը՝ վարչապետ Նիկոլ Փաշինյանի, Երևանի քաղաքապետարանը՝ քաղաքապետ Տիգրան Ավինյանի և Քանաքեռ-Զեյթուն վարչական շրջանի ղեկավարի աշխատակազմը՝ վարչական շրջանի ղեկավար Արտակ Հովակիմյանի գլխավորությամբ, ձեռնամուխ եղան, որ պետք է հասնեն նրան, որ այգին վերադարձվի պետությանը՝ տվյալ դեպքում մեզ՝ ժողովրդին։ Երկար ու ձիգ տարիներ Երևանի քաղաքապետարանն ու Քանաքեռ-Զեյթուն վարչական շրջանի ղեկավարի աշխատակազմը պայքարել են ու շնորհիվ նրանց համառ աշխատանքի՝ այգին վերադարձվեց ժողովրդին, ու ապշած ենք, թե ինչպես կարելի էր երևանցիների սիրելի զբոսայգիներից մեկը հանուն իրենց «թափանները լցնելու» 3 մլրդ դրամով բանկի տակ դնել։ Երկար ու ձիգ ամիսներ, անգամ եղանակային ոչ բարենպաստ պայմաններում, այգում հսկայածավալ աշխատանքներ են իրականացվել։ Հիմնովին փոխվել են շատրվանների համար եղած ջրագծերը, ջրի խողովակները, արտաքին լուսավորության համար նախատեսված էլեկտրական լարերը, սյուները, ստեղծվել են նոր, ավելի հարմարավետ ջրահեռացման համակարգ, հեռացվել են դարն ապրած ծառերը, փոխարենը տնկվել են նորերը։

Դեռ զբոսայգու բարեկարգումը չէր ավարտվել, բայց չորս անգամ սանիտարական մաքրման աշխատանքներ էին իրականացվել։ Այգու տարածքն և հարակից մայթերը ամբողջությամբ փոխվել ու սալիկապատվել են և որ ամենակարևորներից մեկն էր՝ Երևանի քաղաքապետ Տ․ Ավինյանն ու Ա․ Հովակիմյանը ընդառաջել են բնակիչներիս խնդրանքը և այգու մի անկյունում կառուցել են շների համար հատուկ զբոսավայր։ Հիմա վստահ ենք, որ ամիսներ անց այս այգին նորից դառնալու է երևանցիների, ինչու չէ՝ զեյթունցիների համար սիրելի վայր, ու հարևան վարչական շրջաններից հոսքը չի դադարելու այստեղ՝ մեր սիրելի Դավիթ Անհաղթի զբոսայգի»։

Ինչպես ավելի վաղ հայտնել էր  SHAMSHYAN.com-ը, վերջին տարիներին Երևանի քաղաքապետարանի և որոշ վարչական շրջանների ղեկավարների կողմից Երևանում ստեղծվել և շարունակվում են ստեղծվել նաև «շների այգիներ»։

Եղել են բազմաթիվ խնդրանքներ Երևանի քաղաքապետ Տիգրան Ավինյանին՝ քաղաքացիների կողմից, որ իրենք նույնպես ուզում են, ինչպես քաղաքակիրթ երկրներում, իրենց վարչական շրջաններում էլ կառուցվեն նման այգիներ։Քանաքեռ-Զեյթուն վարչական շրջանի՝ դեռ խորհրդային տարիներից երևանցիների համար ամենասիրելի վայրերից մեկը համարվող Դավիթ Անհաղթ զբոսայգին, որը վերջին տարիներին վերածվել էր մի իսկական աղբավայրի, շնորհիվ Քանաքեռ-Զեյթուն վարչական շրջանի ղեկավար Արտակ Հովակիմյանի, արդեն նոր շունչ էր առնում։

Մանրամասները՝ սկզբնաղբյուրում