Նեթանյահուի դեմ կոռուպցիոն գործերով դատական լսումները կվերսկսվեն ապրիլի 12-ին

Իսրայելի վարչապետ Բենիամին Նեթանյահուի նկատմամբ կոռուպցիայի վերաբերյալ երեք գործերով դատական լսումները կվերսկսվեն ապրիլի 12-ին Երուսաղեմի շրջանային դատարանում: Փետրվարի վերջից դրանք ընդհատվել էին Իրանի դեմ ռազմական գործողության պատճառով։ Ինչպես փոխանցում է ՏԱՍՍ-ը, այս մասին հայտնել է դատարանի մամուլի ծառայությունը։

«Արտակարգ դրության ռեժիմի չեղարկման և դատական համակարգի աշխատանքի վերսկսման կապակցությամբ՝ [Նեթանյահուի գործերով] լսումները կվերսկսվեն բնականոն հունով»,- ասված է հայտարարության մեջ։ Մասնավորապես, դրանք տեղի կունենան կիրակի օրերին՝ Երուսաղեմի շրջանային դատարանում, իսկ երկուշաբթիից չորեքշաբթի՝ Թել Ավիվի շրջանային դատարանում։ Փետրվարի 28-ին Իրանի դեմ ռազմական գործողության մեկնարկից հետո Իսրայելի արդարադատության նախարարությունը դատարաններում «արտակարգ դրություն» էր հայտարարել, որի ընթացքում քննվում էին միայն հրատապ գործերը։

Իսրայելի վարչապետը մեղադրվում է կոռուպցիոն երեք գործով՝ ավելի քան 700 հազար շեկելի ($230 հազար) չափով անօրինական նվերներ (ներառյալ՝ սիգարներ և շամպայն) ստանալու, լրատվամիջոցների կարգավորման հարցում խարդախության՝ իր քաղաքականության բարենպաստ լուսաբանման դիմաց, և կաշառակերության մեջ՝ ի շահ ընկերների նախագծեր առաջ մղելու նպատակով։ Թել Ավիվի և Երուսաղեմի դատարաններում գործընթացը շարունակվում է 2020 թվականից, իսկ վարչապետը սկսել է ցուցմունքներ տալ 2024 թվականի դեկտեմբերին։ Նեթանյահուն բազմիցս հերքել է իր մեղքը։

Ավելի վաղ Իսրայելի պաշտպանության բանակը հայտարարել էր ապրիլի 9-ից բնակչության համար գրեթե բոլոր սահմանափակումների չեղարկման մասին, որոնք ներդրվել էին փետրվարի 28-ին՝ Իրանի հետ առճակատման մեկնարկից հետո: Բանակի մամուլի ծառայության հայտարարության համաձայն՝ իրավիճակի գնահատումից հետո որոշում է կայացվել, որ ապրիլի 9-ի առավոտից երկրի շրջանների մեծ մասում կթույլատրվի ցանկացած տեսակի գործունեություն առանց սահմանափակումների, ներառյալ՝ ուսումնական գործընթացը: Միևնույն ժամանակ, մի շարք շրջաններում դեռևս կսահմանափակվեն զանգվածային փողոցային միջոցառումները (թույլատրվում է ոչ ավելի, քան 1000 մասնակից), իսկ մեղմացումները չեն տարածվի Լիբանանի հետ սահմանակից Իսրայելի հյուսիսային շրջանների վրա:

ԱՄՆ նախագահ Դոնալդ Թրամփն ապրիլի 7-ին հայտարարել է Իրանի հետ երկշաբթյա փոխադարձ հրադադարի մասին։ Նրա խոսքով՝ կողմերը լուծել են գրեթե բոլոր վիճելի հարցերը, և Վաշինգտոնը որպես հետագա բանակցությունների «աշխատանքային հիմք» դիտարկում է Թեհրանի ներկայացրած 10 կետից բաղկացած առաջարկները։ Սպիտակ տան ղեկավարը նշել է, որ որոշումն ընդունվել է Հորմուզի նեղուցը բացելու Իրանի պատրաստակամության պայմաններում։ Թեհրանն իր հերթին համաձայնել է դադարեցնել «պաշտպանական հարձակումները», եթե Իսլամական Հանրապետությանը հարվածներ չհասցվեն։

Պակիստանի վարչապետ Շահբազ Շարիֆը, ով հանդես է գալիս որպես միջնորդ կողմերի միջև, նրանց հրավիրել է բանակցությունների ապրիլի 10-ին։ Իրանի պետական հեռուստատեսության տվյալներով՝ ակնկալվում է, որ դրանք կլինեն ուղիղ բանակցություններ։ Միևնույն ժամանակ, ՏԱՍՍ-ի տեղեկացված աղբյուրը հայտնել է, որ ԱՄՆ-ի և Իրանի բանակցությունները Պակիստանի մայրաքաղաք Իսլամաբադում կսկսվեն շաբաթ օրը և, ըստ կանխատեսումների, կտևեն մի քանի օր։