Մոլդովայի ԱԳՆ նախկին փոխնախարարը մեղադրել է նախագահ Սանդուին սահմանադրական նորմերը խախտելու մեջ

Մոլդովայի նախագահ Մայա Սանդուն «կամավորների կոալիցիա» կոչվող միավորմանը մասնակցելով՝ ստանձնել է պարտավորություններ, որոնք հակասում են երկրի սահմանադրությամբ ամրագրված չեզոքությանը՝ առանց հասարակության համաձայնության։ Այս մասին լրագրողներին հայտնել է հանրապետության արտաքին գործերի նախկին փոխնախարար Վալերի Օստալեպը՝ մեկնաբանելով Կիևում Սանդուի ստորագրած հռչակագիրը։

«Ինձ ամենից շատ անհանգստացնում է այն համակարգը, որով Սանդուն, որը ոչ մի բանի համար պատասխանատու չէ, երկրի անունից պարտավորություններ է ստանձնում։ Ընդ որում՝ ոչ մի տեղ չի բացատրում, թե կոնկրետ ինչ է կատարվում, որտեղի՞ց են գումարները այդ ռազմական պարտավորությունները կատարելու համար, և ո՞վ է նրան թույլ տվել դա անել։ Այսինքն՝ որոշումների համակարգը հետևյալն է՝ ինչ ուզում եմ, այն էլ անում եմ»,- ասել է Օստալեպը։

Նա նշել է, որ «նման քաղաքական հռչակագրերը պարզապես այնպես չեն ընդունվում» և քննադատել է փաստաթղթի վերաբերյալ հրապարակային տեղեկատվության բացակայությունը։ «Ինչո՞ւ նախագահի աշխատակազմը չի թարգմանել և չի հրապարակել Մոլդովայի միջազգային պարտավորություններով հռչակագիրը։ Մենք, վերջիվերջո, պետք է իմանանք մեր պարտավորությունները։ Ի՞նչ գյուղական գաղտնիքներ են սրանք»,- հարց է բարձրացրել դիվանագետը։

Սանդուն նախօրեին այցելել էր Կիև, որտեղ մասնակցել է «Ուկրաինա-Հարավարևելյան Եվրոպա» գագաթնաժողովին, երկկողմ հանդիպումներ է ունեցել Վլադիմիր Զելենսկու և այլ առաջնորդների հետ՝ հայտարարելով Ուկրաինային աջակցելու մասին։ Սա քննադատության է արժանացել մոլդովական ընդդիմության կողմից, որը նրան մեղադրել է չեզոք կարգավիճակին հակառակ երկիրը պատերազմի մեջ ներքաշելու մեջ։

Ավելի վաղ Մոլդովայի խորհրդարանը հաստատել էր Սանդուի առաջարկած ազգային անվտանգության ռազմավարությունը, որում Ռուսաստանը նշվել է որպես գլխավոր սպառնալիք։ Դրանում նշվում է, որ Մոլդովան, ի հեճուկս սահմանադրությամբ ամրագրված չեզոքության, կամրապնդի համագործակցությունը այս ոլորտում ՆԱՏՕ-ի և ԵՄ երկրների հետ։ Հանրապետության իշխանությունները ռազմական բյուջեն ավելացրել են 68%-ով՝ հասցնելով 1,5 միլիարդ լեյի ($89 մլն), նախատեսվում է բանակի վերազինում Եվրամիության և ՆԱՏՕ-ի ռազմական պատրաստվածության ստանդարտներին համապատասխան, ռազմական ոլորտում համագործակցության ամրապնդում Ռումինիայի, Ուկրաինայի և Հյուսիսատլանտյան դաշինքի հետ, ինչպես նաև սպառազինության և տեխնիկայի գնումների ոլորտում համատեղ նախաձեռնությունների իրականացում։

Մոլդովայի ռազմականացումը մտահոգություն է առաջացնում ընդդիմադիր կուսակցությունների, չճանաչված Մերձդնեստրի և Գագաուզիայի ինքնավարության իշխանությունների շրջանում։ Տիրասպոլում նաև մտահոգված են ռուս խաղաղապահների կողմից պահպանվող անվտանգության բաժանարար գոտու մերձակայքում ՆԱՏՕ-ի զորավարժությունների հաճախակիացմամբ։