Մեքենան կոտրելուց հետո Արցախի պետնախարարից գումար են պահանջել՝ հայելիները վերադարձնելու համար․ «Փաստինֆո»

Այսօր հայտնի դարձավ, որ գիշերը կոտրել են Արցախի պետնախարար Նժդեհ Իսկանդարյանի մեքենան՝ պատճառելով գույքային վնաս։ «Փաստինֆո»-ի հետ զրույցում Իսկանդարյանը ասաց, որ կոտրել և տարել են մեքենայի կողային հայելիները, իսկ հետո նրա հետ կապի են դուրս եկել ու գումար պահանջել՝ դրանք վերադարձնելու համար։

«Telegram-ով գրում են, ասում՝ ոչ ոստիկանությունը, ոչ էլ ԱԱԾ-ն չի կարող օգնել, բայց անկեղծ ասած՝ հարցեր կան։ Կամերաներով նայել են, ասում են՝ մի հոգի է եղել, դիմակով։ Ես չեմ տեսել, բայց իմ մեքենայի կողքին թանկարժեք շատ մեքենաներ են եղել։ Հարցեր են առաջանում՝ ինչու են միայն իմ մեքենան վնասել, այն էլ հանրահավաքից մի քանի օր անց»,– նշել է պետնախարարը։

Նրա փոխանցմամբ՝ անցած հանրահավաքից հետո ևս քրեական գործեր էին հարուցվել, որոնք սառեցվել էին, իսկ սեպտեմբերի 2-ի հանրահավաքի հաջորդ օրը իրեն հայտնել են, որ վարույթ է նախաձեռնվել։ «Դրան հաջորդել է այս հարձակումը մեքենայիս վրա... զուգադիպությո՞ւն է։ Հարցեր են, որոնց պետք է պատասխան գտնել։ Ամեն դեպքում ես էլ չգիտեմ։ Իրականում չեմ բացառում, որ սա կարող է զուգադիպություն լինել, բայց եթե ինձ եք հարցնում, վստահ եմ, որ այդպես չէ։ Բացի այդ, ոչ միայն ես եմ հետապնդվում, այլև ընկերներիս նկատմամբ են գործեր հարուցվում։ Աշխատանքի տեսչությունից վարույթ է նախաձեռնվել, ամսի 12-ին լսումներ են լինելու։ Ամեն դեպքում կարծում եմ, որ հարցեր կան, որոնց ոստիկանությունն ու իրավապահները պիտի պատասխանեն»,-ասել է Իսկանդարյանը։