Թրամփը Թայվանին զենք վաճառելու մասին որոշում կկայացնի Չինաստան այցից հետո. Պենտագոնի ղեկավար

ԱՄՆ նախագահ Դոնալդ Թրամփը Թայվանին ամերիկյան սպառազինության վաճառքի վերաբերյալ որոշում կկայացնի Չինաստան կատարելիք իր առաջիկա այցից հետո. հայտարարել է Պենտագոնի ղեկավար Փիթ Հեգսեթը։

«Նախագահն այժմ պատրաստվում է ուղևորության, և ես ուղեկցելու եմ նրան։ Դրա հետ կապված բոլոր որոշումները նա կկայացնի անձամբ», - ասել է Հեգսեթը լսումների ժամանակ՝ ի պատասխան կղզուն սպառազինության հետագա վաճառքի ծրագրերի մասին հարցին։

Երկուշաբթի՝ մայիսի 11-ին, Թրամփը հայտարարել էր, որ Չինաստան կատարելիք առաջիկա այցի ընթացքում ՉԺՀ առաջնորդ Սի Ծինփինի հետ կքննարկի Թայվանին ամերիկյան զենքի հետագա վաճառքի հարցը։

Ամերիկյան առաջնորդը Պեկին կայցելի մայիսի 13-15-ը՝ ՉԺՀ նախագահ Սի Ծինփինի հետ բանակցություններ վարելու համար։ Ի սկզբանե Թրամփի այցը Պեկին նախատեսված էր մարտի 31-ից ապրիլի 2-ը, սակայն հետաձգվել էր Իրանի շուրջ ստեղծված իրավիճակի պատճառով։