Տղամարդու մոտ խոշոր չափերի հասնող մարիխուանա կար․ բացահայտում

Քրեական ոստիկանության գլխավոր վարչության թմրամիջոցների անօրինական շրջանառության դեմ պայքարի վարչության ծառայողները պետական եկամուտների կոմիտերի մաքսանենգության դեմ պայքարի վարչության և ոստիկանության Մեղրիի բաժնի ծառայողների հետ իրացրին ստացված հերթական օպերատիվ տեղեկությունը։

Մայիսի 23-ին, ժամը 7.45-ին, Մեղրիի մաքսակետում զննման արդյունքում Իրանից Հայաստան ժամանած 27-ամյա մի երիտասարդի մոտ հայտնաբերվեց ընդհանուր 29,10 գրամ մարիխուանա տեսակի թմրամիջոցի նմանվող դեղնականաչավուն զանգված:

27-ամյա երիտասարդը ապօրինի թմրամիջոցներ ձեռք բերելու, պահելու և մաքսանենգ ճանապարհով Հայաստան ներկրելու հիմնավոր կասկածանքով ձերբակալվել և տեղափոխվել է ոստիկանության Մեղրիի բաժին:

Սյունիքի մարզային քննչական վարչությունում նախաձեռնվել է քրեական վարույթ: Երիտասարդը տեղափոխվել է ձերբակալվածների պահման վայր։ Հանգամանքները պարզվում են։