Իրանում կոչ են արել Արևմուտքին զրկել «գերազանցության և անպատժելիության կեղծ զգացումից»

Իրանի արտաքին գործերի նախարար Աբբաս Արաղչին ընդգծել է Արևմուտքին «գերազանցության և անպատժելիության կեղծ զգացումից» զրկելու անհրաժեշտությունը, ինչը թույլ է տալիս նրան հանցագործություններ կատարել կամ լռության մատնել այլ երկրների նկատմամբ իրականացվող հանցագործությունները:

«Այն, ինչ ժամանակին աներևակայելի և ամոթալի էր համարվում, այսօր արևմտյան մայրաքաղաքներում կա՛մ անտեսվում է, կա՛մ բացահայտ ողջունվում. սարսափելի ցեղասպանություններ, այլ պետությունների ինքնիշխանության ցնցող խախտումներ, բացահայտ ծովահենություն: Այս հանցագործությունները և դրանց վերաբերյալ Արևմուտքի լռությունը հնարավոր են միայն այն դեպքում, երբ առկա է անպատժելիության զգացում: Գերազանցության և անպատժելիության այս կեղծ զգացումը պետք է ոչնչացվի բոլորիս կողմից»,- հայտարարել է Արաղչին Նյու Դելիում՝ ԲՐԻԿՍ-ի ԱԳ նախարարների հանդիպման ժամանակ ունեցած իր ելույթում, որի տեքստը հրապարակվել է նրա Telegram-ալիքում:

Նախարարը նաև կոչ է արել ԲՐԻԿՍ-ի երկրներին «անվերապահորեն դատապարտել ԱՄՆ-ի և Իսրայելի կողմից միջազգային իրավունքի նորմերի խախտումները, ներառյալ նրանց ագրեսիան Իրանի դեմ, հակազդել միջազգային ինստիտուտների քաղաքականացմանը և գործնական քայլեր ձեռնարկել պատերազմները կանխելու համար»:

ԲՐԻԿՍ-ի ԱԳ նախարարների խորհրդակցությունն անցկացվում է մայիսի 14-15-ը՝ Հնդկաստանի նախագահությամբ: Նախատեսված է երեք նիստ. «Գլոբալ և տարածաշրջանային խնդիրներ», «ԲՐԻԿՍ-ի 20 տարին. համատեղ ջանքեր հանուն կայունության, նորարարությունների, համագործակցության և հավասարակշռված զարգացման», «Գլոբալ կառավարման և բազմակողմ համակարգի բարեփոխում»:

ԲՐԻԿՍ խումբը ստեղծվել է 2006 թվականին, 2011-ին սկզբնական կազմին (Բրազիլիա, Ռուսաստան, Հնդկաստան և Չինաստան) միացել է ՀԱՀ-ը: Եգիպտոսը, Իրանը, Արաբական Միացյալ Էմիրությունները և Եթովպիան միավորման լիիրավ անդամ են դարձել 2024 թվականի հունվարի 1-ին: 2025 թվականի հունվարի 6-ին ԲՐԻԿՍ-ին է միացել Ինդոնեզիան: Նաև նախորդ տարվա սկզբից խմբի գործընկերների կարգավիճակ են պաշտոնապես ստացել Բելառուսը, Բոլիվիան, Կազախստանը, Կուբան, Մալայզիան, Թաիլանդը, Ուգանդան և Ուզբեկստանը, հունվարի 17-ին՝ Նիգերիան, իսկ հունիսի 14-ին՝ Վիետնամը: