Ադրբեջանը ԼՂ-ի զավթմամբ բավարարվել չի պատրաստվում․ ադրբեջանագետ

Պատմական գիտությունների թեկնածու, Ադրբեջանի հարցերով փորձագետ Տաթևիկ Հայրապետյանը տելեգրամյան իր ալիքում գրում է․

«Ադրբեջանական հանրային «Az TV» հեռուստաընկերության կիրակնօրյա թողարկման ժամանակ անդրադարձ է արվում ընտրություններից անմիջապես հետո Ալիևի այցին դեպի ՀՕՊ կայանքներ։

Հաղորդման մեջ նշվում է՝ Ալիևի ուղերձը հետևյալն էր՝ շարունակվելու է Շուշիի թուրք-ադրբեջանական դեկլարացիայի կետերի իրագործումը։ Այդ դեկլարացիան ռազմաքաղաքական պակտ է ուղղված նախևառաջ Հայաստանի, բայց երկարաժամկետ առումով նաև տարածաշրջանի այլ պետությունների դեմ։

«Նախագահ Ալիևն այն ուղերձն է հղել, որ բոլոր նրանք, որ սխալվում են բոլոր նրանք, ովքեր մտածում են, որ Ադրբեջանը հանգստանալու է Ղարաբաղը վերցնելուց հետո»,-ասվում է թողարկման մեջ։

Ադրբեջանական կողմը ևս մեկ անգամ վերահաստատում է այն պարզ ու հայտնի իրողությունը, որ իրենք Լեռնային Ղարաբաղի զավթմամբ բավարարվել չեն պատրաստվում։

Այս ագրեսիվ հռետորաբանությունը, քարոզվող ատելությունն ու թշնամանքը կարելի է ուղղվել հենց Բաքվի դեմ։ Բայց փոխարենը ՀՀ իշխանությունների կողմից ընտրվել է տակտիկա, որն արդարացնում է ագրեսիան ու պատերազմը, իսկ դա շատ վտանգավոր հետևանքներ է ունենալու մեր պետության համար»։

Հիշեցնենք, որ համագործակցության մասին Շուշիի հռչակագիրն Ադրբեջանի և Թուրքիայի նախագահների կողմից 2021 թվականի հունիսի 15-ին ստորագրված համագործակցության մասին պայմանագիր է: Հռչակագիրը ենթադրում է փոխադարձ ռազմական օգնություն և սերտ համագործակցություն ռազմարդյունաբերության ոլորտում։